Daags nao de provinciale activiteite rondom de eupening van ‘t Vastelaovessezoen, sjtong veur de männer van Twieë ‘geweun’ eine wedstried in de planning. Oet ervaringe is gebleeke dat de periode van de carnaval neet de sjterkste kwaliteit is van Twieë. Maar good, dao mosse dan geweun neet bie sjtil sjtoan, dat mosse geweun vergeate. En laot noe jus dát gein probleem zeen geweas aafgelaupe zondig, want der waore der ein aantal bie die auch eine haup van de zoaterdig waore vergeate. Maar good, dao bèsse jongk veur (geweas) en wat is noe ein sjrèmke mieër of minder? Es ver ôs mèr neet teage de lamp zouwe loupe…

Naodat de weag richting Ophoave veilig waor aafgelach, kosj de wedsjtriedveurbereiding beginne. Ongertössje sjloot the Goose auch get nonchalant laat aan. Waarvan akte. Rond de klok van hauf twèllef waor der echter nog gein leidsman te bekènne. Dit leidde tot onrus, want eine wedsjtried zonger sjeids is es eine carnaval zônger Beppie: ongecontroleerd en hieël ongemekkelijk. Gelökkig woort der eine vervanger gevonge en, alvas eine spoiler veur uch es leazer, dea waor perfec!

Oeteindelijk kosj de wedsjtried toch nog vrie rap van sjtart en begosj ‘t aan beide kante get rommelig. Al vrie sjnel volgde eine domper veur de männer van Genhout. Jaaa-hh-aa-hp dae hauw in de weak veuraaf get las van de kuute, maar wat wilse auch angers mèt kuute die groater zeen es de gemiddelde sjoonsdoas en heller es MP75 in ein mengverhouding van 3 op 3? Gelökkig kosj ‘r waal sjtarte, maar helaas neet veur lang. Nao ein kleine 5 minuute hauw ‘r nao ein ongelökkig duel ein blessure aan de knee en mosj ‘r ‘t veld verloate. ‘Miel vanne Rompeleberg verving heum en moch goan broeze in de punt op zeuk nao ein eupening. ‘T sjient dat shock-proteïne (de gemiddelde Genhoutenaer haet die neet) enorm hellepe om verdedigers letterlijk sjrik aan te jaage en ze eine kouwe douche te bezörge..

De ban woort rond ‘t kwarteer gebroake. Ein actie euver rechs leverde eine cörner op en Frijns lag aan veur de trap. Dizze dreijde richting goal bie de ieërste poal en woort dao door ‘nne man of èllef (ta-taaa) gemis, wo-onger de keeper: 0-1! Hiemèt eupende Frijns zien reakening veur Twieë. Daonao bleef ‘t nog get zeuke, echter zonger dat DVO gevearlijk koos weare. Neet väöl later, zoa rond de viefentwintigste minuut, woort der wederom eine gooije aanval opgezat door GSV. Via get gelök bleef de bal in bezit en woort ‘r opgepik op ‘t middeveld. Vanoet doa woort Prosje gevonge en dae leet ‘m lekker ‘valle’ veur Frijns dae keem inloupe. Dea letste sjoof ‘m vakkundig in de linkerhook en der kosj alweer gejuich weare: 0-2!

Hienao mosj helaas waal weer eine domper verwèrk weare, want auch Siebyech kosj neet wiejer. Ondanks dat de hauve marathon ‘m väöl inzichte heat gegeave, zeen de naoweeje neet mals en is ‘r helaas nog neet pienvrie. Dae van de horloages moch dus auch al vrie sjnel zien opwachting maake. Missjien dat hae der get tiki-tokkie voetbal in kosj brènge. Of ‘t noe aan dat looch, of get angere versjuuvinge, langzaam veel alles op zien plaats en waor de veldbezètting aan ‘t beatere. Hieël eave mosj get sjpanning derin komme veur de get ouwere supporters die in sjloap dreigden te valle en dao zörgde ver dan waal eave veur naodat DVO ôs de bal sjportief terök goof. Zoa hèl es dat keepers normaal roope, zoa sjtil waor ‘t noe en der gebeurde vrie weinig. Dae van DVO hauw dat gauw gesjoate en tikte ‘m derlangs, maar de hook waor net get te sjerp um ‘m derin te tovere. Ontsjnap aan de 1-2 dus.. Eave later verdeende de Sjömmertse Cristiano eine vriejen trap in de rechterhook. Limps (dae nutte egoïs..) goof ‘m sjtrak richting twieëde poal en zônger dat der ein kans waor veur ‘m in te köppe ging ‘r mèt get gelök euver de keeper heen: 0-3! Relatief ongekende luxe dus…

In de rös leek ‘t derop dat DVO zich neet in ‘t ranja-klassement ging ‘menge’, maar toch versjeene der esnog geale kanne. Al mèt al waor dit zeker good te verteere. De naosjmaak waor prima en ‘t looch neet oppe maag; de hoeveelheid in combinatie mèt de leefde die derin zoot maakte alles toch in totaal tot ‘n waardige 7,6. Complimente van ‘t commitee. In de rös waor der verder veural rös en dat is auch waal ins fijn in dizze euverprikkelende maatsjappie.

In de twieëde hèllef waor ‘t dus zaak de euverwinning euver de sjtreep te trèkke. Maar aangezeen de verdediging weer sjtong wie ‘n moer (Nickytarian zit derbie natuurlijk) keeme ver, boete ‘t accidentje, neet in echte probleme. Gelökkig veel al sjnel de definitieve tik. Naodat eine veurzat vanaaf links woort weggekup in de 16 van DVO, sjtong Frijns op de rand van de ‘box’ al te wachte op de aafvallende bal. Hae leet ‘m neet sjtuute en volleerde de bal ‘sjiek en sjoen’ in ‘t heukske: 0-4 dus! Dit kosj neet mieër misgoan en de jongste van ‘t sjtèl dae kosj zelfs rös gegund weare. De Witte Goas moch nao zien München-escapades ziene rentree maake. Vriend én vijand wees ‘r te verbaaze door af en toe te sjtruije mèt passes op maot. Af en toe waal auch eine vertroewde ‘Oh lekkker…’-bal dertössje, zoadat ver zeker waore dat ‘t waal degelijk de Goas waor. Wo ein paar kleine bloare, die dus waal 16 weake rös neudig höbbe, waal neet good veur kènne zeen.. ‘T sjient dat ‘r noe auch veuraafgaond aan ‘t volgende sezoen nao Santiago (röstig blieve Käöl en Joeps..) de Compastella geit trampele om veural mèt väöl bloare aan ‘t sezoen te sjtarte. De Goas goof dus waal nog eine prachtige assist: eine hoage veurzat dae bie de twieëde paol vakkundig woort bènne geköp door, weam angersj, Frijns! 0-5!!

Om in de weurd van de veurzitter te sjpreake: de lètste kieër dat ‘t twieëde 0-5 wees te winne in eine oetwedstried dat waor op 17 november 2019 (kiek ‘t mer nao..), wie der op zondigmörrege, noa de eupeningaovend in Genhout, gewonne woort bie Veritas! Wederom ein prachtige prestatie van de manne van Twieë. De Vastelaovend is Ontwaak (sjnap g’r ‘m?) en dit kriet volgende zondig ein vervolg in Genhout teage Laor 2. Fijneeee zondiiiiiig!

En verder? Gein nuuts!