‘T heat effekes moage doere, mer noa zoaväöl vroage van de luu die te lui zeen om noa ‘t Twieëde te komme kieke, is der vanoet ‘t secretariaat van ‘t Twieëde toch besjloate om de notule van elke wedsjtried weer openbaar te publicere. Dus dit joar kènt ger uch weer ein urke in de weak vrieplanne op ‘t werk, tenzij ver ze op zondig dik geloetsj kriege natuurlijk. Dan sjrief ver namelijk hieëlemoal niks. In ‘t Hollesj zouwe ze dat plaatse onger ‘t köpke MWJ: “Mooi Weer Journalistiek”. Of in voetbalterme: “Succesjournalistiek”. Enfin, ger sjnapt ‘t waarsjienlijk. Samenvattend: Ver zeen weer terök!

Noa ein joar sabbatical (ein joar wo-in ver effe de anger clubs höbbe loate preuve aan succes), probeer ver dit joar weer get dervan te goan maake. Dat doon ver mèt groatendeils dezelfde groep, mèt get aanwinste vanoet ‘t reserveteam van GSV. Die weeste allenei al ins de weag noa ‘t Twieëde te vinge, al is ‘t noe officieel hun besjtumming gewoore. Doaneave nog get jeug (die wat bekans van 2010 zeen, belachelijk…) toegevoeg die moage preuve aan ‘t Twieëde. Bie dizze dus eine officiële welkom aan Maikel, Steef, Djordy, Tom, Hugo, Ids, Rei, Stan V en Morris. Wilt ger ze beater lieëre kènne? Op elke woonsdigoavend tössje 19:11 en 20:11 is der ein inloupurke in de Dorpsgaard wo zie allemoal tied veur uch vriemaake.

Zoa wie elk seizoen begin se mèt aafsjproake, ambities, goeie zin, voldoende motivatie en eine gooije sjtaf. Dae sjtaf haet echter flink get noageloate: Brandon is weer goan voetballe, Ivo ziene cruise is in Roggel gesjtrand en der waor neemes dae assistent van Rean wouw zeen. Eine leider höb ver waal. Op papier dan: Nickytarian. De jong is sinds dit seizoen op zichzelf aan ‘nt wonen en zoa wie jekerinne weit: de woningpries tegewoordig is belachelijk. Sjienbaar zoa belachelijk dat ein tientje veur eine wekker of 15 euro veur eine tillefoonlaajer teväöl gevroag is veur de jong. Auch Nicky kent ger sjpreake op woonsdig, al is ‘t de vroag of hae kömp opdaage. Hae is euverigens auch te boeke veur ‘t organisere van eine lunch op de crematie van uch hoesdeer, doa serveert ‘r mèt alle leefde gebakke loch.

Good, ver höbbe inmiddels auch al get gevoetbalt her en der. ‘T begint mèt get oefenputjes, die dit joar al mèt al prima verleepe: DVO (3-5), Eijsden (5-0) en Voerendaal (2-1). ‘T sjpannendste van dizze oefencampagne waor de sjtrijd neave ‘t veld tössje DJ-ordy en ‘n Voerendaals koo. De charme van ‘t Zuid-Limburgse voetbal in ein notendop. In de verkapte oefenwedstrieje, sommige clubs numme dit ‘t beakeravontuur, ging ‘t auch vrie aardig. Ver wonne van ieërsteklasser Zöstere mèt 4-3, maar ginge ein weak later keihel aaf taege Landgraaf (4-6), naodat ver mèt rös 3-1 veur sjtonge. Dae kater kosj enigszins weggesjpeuld weare teage Limburgia, die nao 11 minuute al mèt 10 wier mochte wegens ein roaj kaart. De wedstried zou noats sjpannend weare (5-0), maar waor te weinig om door te beakere. Oeteindelijk is de beaker winne auch mer get veur reserveteams, dus dao hauwt veer ôs leever neet mèt bezig.

Tied veur ‘t echte werk: de competiesje! Dit seizoen zit ver weer in de vertrouwde 2e klas, mèt pleug in de buurt en veurnamelijk regio Mesjtreech. Alle kilomeaters biejein optellend dit seizoen kom ver net aan in de buurt van éín van de 12 oetwedstrieje nao ein van de Broabanders die ‘t ieërste maog bezeuke. Good veur ‘t milieu. Maar zoa zeen veer: echte strijders veur ‘n lage oetsjtoot. Kiek bieveurbeeld nao de training: auch hie is aan de oetsjtoot gedach door de buurtbus van Aelse te huure en dao de ganse bubs Sajelaire in te laaje. Enfin, ver goan nao de wedstrieje, want dit versjlaag is langk ‘nt weare. Ver höbbe natuurlijk auch get achtersjtallig ongerhoud. Euver achtersjtallig ongerhoud gesjproake: Hein van Keulers VOF (CEO, Chef Excuses en Ongevallen) is tot op heden vaste keep, maar auch nog neet op tied weite te komme. Dit veur uche administratie.

De ieërste wedstried sjpeelde ver thoes teage Leonidas oet Wolder. Geine onbekende, want 2 seizoene geleeje hauw ver ‘t dao zeker neet mekkelijk mèt. Thoes won ver destieds pas door 3 goale in de letste 5 minuute, en in de letste wedstried van dat seizoen verloorte ver mèt 4-2 en woorte daorom 3e ipv 2e. Alles sjting dus op sjerp om eine gooije sjtart te maake. Dae keem der gelökkig, want door degelijk sjpel, gooije beleaving en de rös om op de goei momente ‘t sjpel ‘doad’ te maake, woort deze wedstried eigelijk noats ein probleem. Nao ein klein hauf oer wees Raf ‘Cristiano van Sjömert’ Gijzen (inmiddels 1 van de 3, hie euver later meer) de score te eupene door ein bekeke sjeut. Dorsjoe, de letste weake enorm op shot, wees d’r dernao al vrie sjnel 2-0 van te maake veur de ‘rwaoje’ en daodoor leek ‘t al vrie sjnel in de sakosj. Dat woort bevestigd door direc nao rös bènne 5 minuute de 3-0 (Christiano) en 4-0 (Lumpes) te maake. Hienao waor ‘t geloupe en kosj d’n trainer Gijziola (nummer 2 van de 3) auch zien angere product inbrenge: it’s Ids (nummer 3 van de 3)! Dizze jong zouwt ger kenne herkenne aan de sjtevige biceps op zien rechtererm, want dao sjöp ‘r elke zonnige daag al uch favoriete bölkes ies oet in de Toare. Door dizze inbreng, sjtong de gebroeders Gijze saame in ‘t veld en hauwe ze ‘t al gauw hoag in de bol door allein mer nao elkaar te sjpele. Cristiano hauw zelfs nog eine omhoal gepland, maar die planning woar helaas al verloupe. ‘T leverde waal ein kiekje veur de historici op (zie bijlage 1). Al mèt al waore in elk geval de 3 punte bènne, woort de 0 gehouwte en waor ‘t nog effe zeuke wie dit gevierd mosj weare.

Ein weak later ging de reis nao de Minor in Nut (sjienbaar is Nuth in ‘t Limburgs Nut, gein idee welke wethouwer hie zien cente mèt heat verdeend, maar dae moag dus bès eine wekker gelle veur Nicky). Vanwege ein jeugfestijn mochte ver op ‘t bieveld aantreaje en woorte sommige al meug van ‘t zeen wie groat dat ‘t veld waor. De wedstried begosj echter voortvarend: noa 3 minuute wees Rim vrie sjerp te zeen dat de keeper veur zien goal sjtong en vanaaf ein meater of 25 lach hae de bal beheers in de lange hook neer: 0-1! ‘T juiche heat ‘r neet aafgekeeke van ziene neaf, maar dao kent nog aan gewerk weare. Nao ongervieër ein 20 minuute woort ‘t sjpel get traoger, sjlordiger en keem de Minor beater in de wedstried. Dit leverde kanse op en die weeste ze auch te benutte: 1-1 en 2-1, nog veur rös. De 2-1 woort euverigens gesjponsord door Phantasialand.

De ranja is de rös woar prima, al sjmaakte ‘t toch neet zoa lekker door die dompers. Nao rös begoosj ‘t echter waal weer ein bietje örges op te lieke en keeme der toch weer get kenskes. In de 50e minuut keem Tommie op links good door via eine prima aanval en goof hae de bal veur. De verdediger kosj der niks mieër van maake en sjoot ‘m achter ziene eige keeper: 2-2! Dernao bleef ‘t balbezit veur de ‘rwoaje’ (GSV, neet allein Bram en Rim), echter groate kanse keeme der auch neet direc oet. ‘T woar dan auch eine penalty in de 80e minuut dae veur de 2-3 zurgde. Nog effe 10 minuute klinisch toe houwe en dan ginge de 3 punt mèt op Genhout aan. Helaas woort die opdrach neet volbrach, want in de 84e minuut woort eine aafgesjlaage bal ‘gesjtoake’ en sjoot d’n ingevalle sjpits de 3-3 bènne.

Al mèt al toch teleursjtèlling dat de euverwinning nog ontglipte, echter mèt 4 oet 2 auch geine verkieërde sjtart. Nog 18 wedstrieje en 55 traininge, zo zou eine wieze oet de Toaresjtraot zeggke. Loat goan!