Lèt op, alvas eine dikke sjpoiler! Aangezeen de ieërste euverwinning bènne is veur de männer van Twieë (dae van Aelse is pleite, dus ver sjrieve ‘t weer normaal), moag der auch eindelijk weer ein versjlaag gesjreeve weare! Uiteraard weer in ‘t Limburgs, want ver zeen tensjlotte ein trotse Limburgse vereiniging, al wille de anger teams dat nog neet gaer aannumme. Dát maak dus ‘t ongersjeijt. Al zeen ver neet ‘t ‘Vlaggenschip’, dan zeen ver bie deze teminste waal ‘t Vlaggesjeep van GSV. En dat is wat tèlt, toch?

Ein anger sjoan biekomstigheid is dat Hollese teagesjtanders der geine bal van zulle sjnappe. Dat is zeer gunstig es se teage bieveurbeeld ein ploog oet Budel(s) mos sjpele. En laot dat noe nét de teagesjtander van aafgelaupe zondig zeen geweas! De wietste reis van ‘t sezoen, 45 minute op de klok, pokke end. De enige en lètste kieër dat dao gesjpeeld is gewoore waor de allerlètste wedstried veur Corona. Budel dus, weer zo’n Braobese vereiniging mèt 15 velde en 48 kleidlokale, maar gein logica. Laot os mèr lekker Limburgs zeen…

De nuuje sjtaf dit jaor mot auch nog kort geïntroduceert weare. Hoofcoach is Arno D. van onger aan de Putbrook. Zien ervaring en mensenkennis mot die jong garde volwasse maake in ‘t veld. Die anger hèllef van ‘döbbel-Derez’ is Willem, dae zouwt ger kènne van zien riesjoal. Hae mot veur ein gooij koppeling tössje sjpelers zörrege en ze af en toe eine sjpeegel veurhauwe. De 3e musketier is Wil Sjtasse. Dat is eine Genhoutenaer én GSV’er en dus bie eekerein bekènd. Zien taak is veural die van Derez in de sjmieze hauwte. Al mèt al ein sjoane compositie van 3, wo de groep blie mèt is.

Nao dees lange introductie kèn ver eindelijk nao de wedstried van aafgelaupe zondig. Nao 4 wedstrieje zonger euverwinning, maar mèt gooije mood en zin vertrok de 12-koppige selectie richting ‘t Braobesje land. Einmaol aangekomme bleek al gauw dat ‘t sjpeuje ging weare. Gauw gauw umtrèkke, ein aafgedankte warming-up op ein wei wat der nog sjlechter bie looch es ‘t trapveld nao de Tentzitting, gauw gauw de shirts aan en nao boete! En dao sjtinge ze, de manne van Budel in ‘t donker-blauw.. Normaal gezeen höbbe ze de kleur van Rouge zien… sjeun: oranje. En dus sjtong ver dao: Genhout in ‘t zjwart, die Hollenders in ‘t donkerblauw. Nou, omkleije zouw se zèggke! Maar neet veurdat d’n leider nog eave wouw laote weite dat in de A-categorie de thoesploog zich aanpas. Good gewèrk jong, in Braobant kènne ze dus én neet kalle, én neet leaze. Zung. Nog veurdat de wedstried begosj waor al eine mentale 0-1.

Enfin, naodat ze zich in hun vertroewde oranje heije geheese, kosj de wedsjtried van sjtart. Ver begoosjte erg sjterk: röstig aan de bal, good georganiseerd en veelvuldig de winnaar van de duels. De sjeids hauw aangegoave; de duels op ‘t middeveld laot ich zoaväöl meugelijk loupe (neet éch letterlijk, want dae sjproak dus auch Holles). Dit tot onvreje van de sjtaf van Budel die mieër mekkerden dan de neudige sjäöp in hunne euvergangk. De ieërste kanse waore auch veur die van Twieë; zoawaal Tommie es RG8 (zichzelf umgeduip tot de Sjömmertse Cristiano) weeste nog neet ‘t netje te vinge. Auch Vini, dae vanaaf de sjtart moch beginne, kreeg ‘m helaas neet tössje de päöl. Verder moch ver auch nog eine sjoane sjeut van J-döbbele-A-döbbele-H-aa-p noteren. Enige ‘plaogsjtoat’ van Braobesje kant keem tot sjtand door ein klein insjattingsfuitje in de Genhouter defensie. Timsalabim wees echter heum genoch op te jaage en de aanvaller lifte ‘m euver de goal. Dit waor auch eine van de zéér karige momente dat de aanvallers eave vrieheid hauwe, want saame mèt Timmie waore Shadow, Rouge, Baco-B en Nickytarian ein ‘moer mèt döbbele rolloag’. Mèt 0-0 de rös in dènk ger? Verkieërd gedach! In de lètste aanval veur rös keem namelijk eine van richting verangerde sjeut in de 16 terech wo Tommie d’r es de kippe bie waor um de bal mèt de kop richting de goal te sjture: 0-1!

Rös. Normaal verwach ger hie ein ranja-recensie. Helaas, helaas. D’r sjting ein tree werreme thee. Werkelijk. Mèt zoa’n wear en thee dènkse aan ‘nne bloemsjikcursus, maar neet aan de rös bie 15 graaje. Mede hiedoor krieg de rös-versjnapering dus ein 2. De manne van de leiding zatte de puntjes nog eave op de ‘i’ en brachte gooije mood veur de twieëde hèllef.

In ‘t begin van de twieëde hèllef sjtonge de Braobenjers get angersjer, en dat waor eave sjakele. Mede door dit ontsjtonge der ruumtes en kreege ze net get väöl van die ruumte. Hiedoor keem de bal bie de sjpits, welke Tim umsjpeelde en de bal in de touwe deponeerde: 1-1. Zouw ‘t weer zo’nne daag weare? Gelökkig waor dit de neudige wèkker um weer eave te ‘resetten’ veur ôs. Ein anger maneer um wakker te weare is um örges ein of anger zelfgemaakte vuurwerkbom aaf te sjteake. Eine flinke sjlaag. Eederein verwèrk dit op zien eige, röstige en ingetoage maneer. Behalve dea van die riesjoal, dae heij ein anger gedachte.. “WHAT THE FUCK IS DIT HEIJ!?”. Ich haup dat de beginnende besjtuurder dit neet te heure krieg es ‘r ‘m hoaks de gevel van de friture in weit te parkere.

Enfin, eekerein waor in elk geval weer sjerp. In de 65e minuut zat GSV eine aanval op rechs op. Via Rouge en Siebyech keem ‘r via Limps bie Tommie en dae haolde d’n trèkker euver: 1-2! Weer fieës veur de manne en de 15 mètgereisde supporters. Wie wier de wedstried verleep, wie mieër Budel nao veure ging drökke en aanvallers ging bringe. Ondanks dat der uiteraard af en toe get hectiek ontsjting, bleef ‘t fort sjtoan. Dat Braobesje oppurtunisme geuf natuurlijk ruumte veur Limburgse counters. Siebyech en Vini hauwe mentaal al 6 marathons derop zitte, maar desondanks bleef de ‘drive’ bie jekerein ongekend hoag. Nao eine misser á la Brobbey van RG8, bleef de haup op ein goal nog ummer aanwezig. Dit resulteerde dan oeteindelijk auch nog in de 1-3. Eine bal van de ziekant woort sjlum ‘vermede’ door Raf d’n ‘Horlogemeaker’ en d’n angere Raf (Cristiano van Sjömmert) keem daodoor gans vrieje op de 16: bingo! Noe koosj der opgeluch fieës gevierd weare en hoofde ‘t degradatiespoak dat in Eindhove ronddwaalde, veurluipig neet nao Zuid-Limburg aaf te dalen.

De good leidende sjeidsrechter heelt ‘t nao 98 minute veur gezeen en de vreugdekreete mochte rondgesjlingerd weare. Ein heerlijke euverwinning en dus de ieërste 3-punter van ‘t sezoen! En aangezeen ‘t de veurige kieër zoa bevalle waor, woort der dernao nog eave naogekalt in hun kentien onger ‘t genot van eine Budels. De luu achter de bar waore blie mèt os en trakteerde os op ein hapje. Sjienbaar zeen toch neet alle luu dao ‘t eins mèt hunne keeper (“Kutlimburgers”). Verder waor ‘t tot 15:25 aardig rustig dao in de kentien, al zal dat neet lang gedoert höbbe…

Aankommende zondig wach de wedstried teage de trotse kopluiper: de manne oet Heugem. Dan zulle ver der weer saame motte sjtoan!

En verder? Gein nuuts!