Nao eine verlaore pot in Sjtein in ‘t carnavalsweekend, waor ‘t weer ins sjoan tied veur ein euverwinning. Dat zou dan motte gebeure op de eige wei teage de manne van DVO. Inmiddels zeen de omsjtandigheden al aardig koud en winters te numme en is ein warming-up dus waal degelijk neudig veur werrem te weare. De opgeknapte unit zörgde dao in elk geval neet veur, want de nuuje vloer kosj mekkelijk gebruuk waere veur ‘t discosjaatse in Glanerbrook.

Naodat de volksleeder gesjpeeld waore en de eupeningsshow geëindig, kosj den aaftrap genomme weare door de ‘roaje’. De eupeningsfase waor ein bietje wie se zouws verwachten van Costa Rica teage Venezuela: bietje rommelig, get euvertredinge en weinig kanse.

Nao 12 minuute sjpele woort der get mekkelijk eine vriejen trap weggeave op ein meaterke of 20. Achter de bal sjtong de lange sjpits van DVO. Ondanks dat langs de kant nog woort geroope “linker been, linker been!” heije de ‘roaje’ ‘t naokieke wie ‘r ‘m mèt rechs bènne sjoot: 0-1. Eine domper. Dernao keem der nog ‘n kenske veur GSV, nao eine actie van der lange Michael, echter vong dea helaas neet de gewunsjte eindbesjtumming. Verder waor der weinig te notere veur ozze bookhouwer.

In de rös weer de motiverende woorden van ozze Van Gaal. ‘T moos en ‘t koos beater, en dan koosj ‘t nog waal ins omdreije. Naodat de ranja weer biegetop waor mèt water en energie biegetank, ging de equippe weer de wei in veur ein goei twieëde hèllef. Der sjeids heij ‘t WK voetbal op sjtoan in zien hutje mèt 24,5 minuute blessuretied en dae keem dus get later. Auch ziene zondig natuurlijk.

In de twieëde hèllef woort ‘t sjpel, euverigens van beide kante, neet ech beater. Väöl hauve belkes, weinig gewonne duels en auch weinig kanse. DVO kreeg waal ‘n twieëtal groate kanse, maar weeste die neet te verzilveren. Ver ginge mieër risico numme en auch de wissels waore aanvallend. Dit leverde waal mieër drök op richting de goal van DVO, echter tot hieële groate kanse leidde dit helaas neet. In de sjlotfase kosj DVO nog ‘nne kieër countere in de groate ruumte achterin en weeste ze zoa de 0-2 nog op ‘t bord te zette. De sjeids goajde zien kanse op ein WK-oproop vervolgens de prullebak in door geine extra tied te reakene. Neet dat ‘t get heij oetgemaak veur de wedstried zelf, maar de FIFA leus dit natuurlijk auch.

Enfin, eine kouwe mörrege um weer sjnel te vergeate veur ozze ‘roaje’ en nao ein goei werreme douche lekker nao ‘t Rien en Pé veur ein breudje rupsjbenjdjdj en anger gefrituurd voodsel. Volgende weak weer nuuj kanse, ‘t begint dan weer op 0-0.