Naodat de rös in Genhout is wedergekeerd noe dat alle juice-kanale en parochie-redacteure weg zeen, kèn ver weer röstig ein versjlaag doon van de veurige wedstried. Natuurlijk waor de opsjtand te begriepe nao ‘t ontbreake van ‘t versjlaag van de pot teage Meersje, maar hie euver waor auch neet väöl te sjrieve boete ‘t feit dat dit geweun eine magistrale pot waor, Hugo d’r 3 wees in te prikke, Jeroen neet wouw prikke en dea wedstried op Wikipedia noe gevonge kènt weare onger de term ‘teamprestatie’. Anger biekomstigheid waor dat de geheimsjriever krank waor (nae.. hae weurd gein prins).

Enfin, aafgelaupe zondig woort der wederom gesjpeeld en dus höbbe al die luu neet lang sjlech hoove sjloape. Nao de euverwinning teage Meersje waore de männer van Tsjwé vriewaal veilig en zelfs good op weag um in ‘t linker rieke te eindige. Teagesjtander waor de manne van Sjtein. Veur Aelsenaere eine échte derby, maar veur os manne auch eine sjoane derby. In Sjtein woort ieërder dit sezoen nog verlaore, mèt ein nuchtere 1-0. Ein anger benoemenswaardig feitje is dat ver alweer de 3e journalis langs de lien heije moage verwelkome. Dizze solicitatie waor zeer euvertuugend, want noats ieërder leet eemes zich al zoa vreug wegsjture in eine wedstried ein weak van teveure. Waarvan akte. Of zeas se dat neet op zo’n moment?

Enfin, de sfeer zoot der nog ummer good in, aangezeen de letste weake de resultate auch good zeen. In de periode geit ‘t lekker en wo normaal rond en nao de carnaval de punten zeer karig zeen, weurd der noe mèt gesjtruijt. Euver sjtruije en angere boere-kal gesjproake; de trainer heij neave eine Inter gesjloape. Keal! Sjienbaar eine 1450, al zou dat waal neet kloppe want op Google krieg ich gein zoekresultaat. Sjienbaar is dat waal good veur diene kater, want dao zooch se niks vanne. Zonger bril. Es se de auge toekneeps. En dernao mèt ein plastice versjet in dien auge zouws sjteake.

Enfin. De wedstried. Dae begosj volgens de journalis langs de lien sjienbaar pas in minuut 14. En laot dat noe net ein sjoan moment zeen. Eine curner van links veur de road-witte. Dizze woort veurgegeave en woort door Siebyech knap teage de touwe geknik! D’r lange! 1-0 veur GSV! Nog amper bekomme daovan, sjtong 1 minuut later Tommie 1op1 mèt de keeper van De Sjter nao eine lange trap van Timsalabim. Helaas wees Tommie neet aaf te ronde, echter leep de aanval waal good verder. De bal keem op rechs bie Dumfries terech dae mèt eine goeije (jao ger leas ‘t éch good!) veurzet ozze Hugo Bulykin wees te bereike. Helaas wees deze de goal (nog) neet te vinge.

Eave later ein situatie die auch oet 2 aanvalle besjtong: eine veurzat van rechs dae net onger Yannick door ging (of Yannick onger de veurzat door?), maar dae esnog via eine sjerpe veurzat richting Bulykin ging. De teagesjtander keem der net veur en wees ‘m nog net neet in eige goal te wèrreke. Nog ummer, maar, 1-0. Wéér eave later waor der eine sjlechte terugkspeelbal van De Sjter kant en Bulykin sjtong 1op1 mèt de keeper. Auch noe wees ozze Hugo (nog) neet te score. Zo wie al vaker is gebleke in ‘t voetbal; “wenn je um zelluf niet derin sjchiet dan valt ie aan de angere kant wel”. En dat gebeurde vlak veur rös: eine aafgevalle bal oet eine vrieje trap kömp veur de veut van eine van De Sjter en dae wèrrek ‘m bènne: 1-1. Ondanks dat kosj ver nog mèt 2-1 de rös in goan. Via eine sjnelle aanval euver links via Rouge goof dae de bal op Tommie in de 16. Dae lach de bal in de loup van Hugo en dizze loag gans veardig veur bènne te wèrreke. Helaas ging auch dizze kans (nog) neet derin.

In de rös goeije ranja. Goeije concentratie en verdeiling, goeije kleur en geur. En zeer milieubewust verpakt. Verder auch nog get weurd van Sjlot, maar dat is biezaak; good de kleidkamer oetkomme, dat waor ein van de dènger, maarja dat boeit wier neemes dea dit leus. In de twieëde hellef waor de bank verlos van de sjlechte grappe van Koehtje en zuuse auch ‘t versjlaag van de journalis veuroet goan. Zien typsjnelheid verdubbelde (nog ummer troag).

Enfin. Al sjnel (veurdat se gedouche, aafgedreug en aangekleijd kens zeen) ging de score op ‘t bord verangere. Euver good oet de kleidkamer komme gesjproake! In minuut 47 keem der eine bal van Tim in de sjnelle loup van Tommie. Noe wees ‘r der road mèt en sjoof de 2-1 bènne! Fiësta! In minuut 52 eine goeije aanval van De Sjter, echter waor Dorsjoe in uitstekende doen en wèrrekte dizze bal perfec weg. In de 63e minuut weer eine goeije aanval vanoet GSV kant dae helaas eindigde in schoonheid in de veut van eine Geal-zjwarte. Echter, door good drök zette keem de bal weer gauw bie GSV terech en vervolgens in de veut van Tommie. Dea heij de sjmaak (van de ranje wersjienlijk) good te pakke en prikte der weer eine in: 3-1!

In de 67 minuut ein moment van eer. Dit haet get inleiding neudig. Vanwege zien 40-jaorig jubileum, maar veurnamelijk veur zien prestaties mèt ‘t 2e elftal de lètste 9 jaor, heij de club namelijk besjloate ozze Huupie te benumme tot erelid. Dit erelidmaatsjap is dus neet vanwege die 45 goale teage Doonder 4, maar alle aanwezigen op de Meerpaalaovend zoaterdig weeste dat ‘t waal degelijk veur ‘t ganse pakket waor. ‘T is dus alles weard geweas, alle sjtress en ‘baalmomentjes’ die veer es twieëde (noe gein Tsjwé want dit is serieus en dus gein woord Aelsers) heum gegeave höbbe. Ere wie ere toe kömp! Maar noe heur ich de criticasters al denke.. wat heat dit mèt minuut 67 te maake? Nae hae is nog gein 67 en ver höbbe in die 9 jaor auch meer wedstrieje gewonne es 67… Nae in minuut 67 keem ein ode aan Huupie. En dizze ode woort mede mogelijk gemaak door Hugo Bulykin! Zien veurige kanse heije gein gelök, maar noe veel alles op zien plaats en wees Hugo de 4-1 bènne te wèrreke oet eine curner. Veer vernumme dea curner, ter ere van zien erelidmaatsjap, gear aan Huupie. Kense ‘n sjoan boeket bloome en ein book van Louis van Gaal kriege.. maar eine curner op de amateurvelde, dat is pas kippevel.

Enfin. Der gebeurde dus nog mieër. De Sjter goof neet op en ging aanvallender sjpele. Dit resulteerde in eine sjeut van ein kleine 30 meater op de goal. Dizze bal leek houdbaar, echter koosj Tim ‘m neet weerhouwe van ‘t netje: 4-2! Waor dit de opmars nao eine comeback van De Sjter? In minuut 82 leek ‘t der nog mieër op wie De Sjter eine, terechte, penalty kreeg. Dizze woort verzilverd en zoa sjtong ‘t 4-3.. Dernao woort ‘t, uiteraard, hectisch. Maar ondanks dat weeste de road-witte toch de sjtand zoa te houwe en kosj de euverwinning gevierd weare!

Dit beteikende wederom ein goeije euverwinning veur de manne van Tsjwé! De reeks mèt 4 teagesjtanders oet de top 4 (allenei dus.. veur de sjnelle reakenear) is dus aardig good volbrach. Enkel Bekkerveld waor, op papier, sjterker. Nog 3 wedstrieje te sjpele en nog kans op ein mooie eindklassering. En belangrieker: mèt zekerheid kènt gezach weare dat GSV 2 wederom eine 1e-klasser blief!

Zondig zeen ver der weer, mèt eine oetwedstried teage DVO. En verder? Gein nuuts!