• GSV'28 2 schakelt naar energiebespaarmodus in tijd van crisis

    Vanwege de toenummende drök van boetenaaf, kosj ver es ‘oethangbord’ van de vereiniging natuurlijk neet achterblieven mèt ein versjlaag. Uiteraard geweun in ‘t Limburgs, zo wie ‘t heurt. Tevens kenne dan auch ôzze Braobesje teagesjtanders geine tactiek aafleaze (auch al zeen die veur ‘t sezoen begoosj al aafgehoak).

    Enfin. Aafgelaupe zonjig sjpeelde, zo wie de volgers weite, de thoeswedstried teage Bekkerveld 2. Eine bekènde teagesjtander, en veurig sezoen good veur ein van de bèste wedstrieje (0-3 winst op ‘vijandig gebied’) en tevens ein van de sjlechste wedstrieje (1-6 verlees op Genhoutse turf) van ‘t sezoen. Mèt de klok ein oer terök op, en de kèrk nog veurloupend op de weareld, woort mèt gooije zin verzameld onger ‘t genot van zomers wear. Sjoan wear veur ‘nne polo zou se zèggke…

    Um 12:00 woort aafgetrap en koosjte de 5e neugetig minute van ‘t sezoen beginne. Dat Bekkerveld qua kwaliteit neet heij ingeleverd zou al sjnel blieke, maar auch ein “wankelend” begin van de Genhouter equippe zörgde der veur dat nao 2 minute sjpele al de 0-1 op ‘t bord sjtong. Wakker. Daonao bleef ‘t get rommelig, en keeme de manne van Genhout neet beater in ‘t sjpel. Ondanks dat, ontsjtinge waal de kanse veur de roaje, sjpelend richting de Meidoornweag. Nao ein kans wat volges intimi “altied 100% goal” is, keem der eave later nog ‘n sjoan kans nao ‘nne veurzet van Dean. Koen heij ‘m op de kop, echter bleek de kop get te klein veur de bal te touchere richting de goal.

    In ‘t vervolg dao-op kreeg Bekkerveld de neudige, groate, kanse. Dit veural door onnauwkeurigheid in de passing en matige aannames. ‘T waor ein gelök dat de veurhoede van Bekkerveld neet gans op sjerp sjtong dat de wedstried nog gans oape bleef. Nao hie en dao get sjpeldeprikjes en eine sjeut van d’r kapitein, waor ‘t helaas toch Bekkerveld dat de 0-2 leet notere. Al mèt al terech, echter nog genoch um veur te sjpele!

    In de rös verheef d’r trainer JS ietwat zien sjtöm om haupelijk os talent wakker te sjudde, want dat zoot nog duudelijk in de zomertied. Nao ein gleaske ranja van ‘t Rien en 2 wissels (Dani de Wit en Meule derin) ging ‘de roaje’ weer de wei op.

    ‘T leek effec te höbbe; ondanks dat ‘t voetballend nog neet herkenbaar waor, waor der in elk geval mieër beleaving en energie te bekènne. Neet de energie wat d’r leider MS en d’r sjpits Ja-Pie op zoaterdig op de vloer lachte, maar toch duudelijk eine Dextro of twieë (of is ‘t tsjweiae) mieër. Maar in dea opleaving koam de dèksel hel aan, wie de 0-3 oet de omsjakeling veel. Dat ‘t de goeije mood neet gebroake hauw, bleek wie ‘de roaje’ wier ginge mèt probeere get dervan te maake. Dat resulteerde oeteindelijk in de aansjleeter op de aansjleetingstreffer. Eine sjerpe veurzet van Meule woort gemis (of tactisch laote sjlippe) door alles in de pot en de keeper kreeg ‘m sjlech verwèrrek. De rebound waor ‘n prooi veur Limps: 1-3.

    De energie greuide, ‘t geluif waor teruuk en de ouwe jeug van de accomodatiekemmissie sjtopte veur eave mèt hun dagelijkse routine (leas: koffie drenke, ‘t nuuts van gistere besjpreake en Duutsje kristoffelvlaai kaane). Naodat auch Ard van Peppe woort ingebrach koosj de weag nao de goal weare veurtgezat. Helaas dat dit festijn woort ongerbroake door eine blauw-witte dae der 1-4 van besjloat te maake nao 65 minuute sjpeele. Dit waor helaas ‘t eind van de ‘road-witte’ sjturm, wat waal nog get kWh heat opgeleverd veur de Genhouter saameleaving in dizze tied van crisis. Oeteindelijk wees nômmer 99 nog eine vrieje trap bènne te sjeete nao ein kleine 5 minute de moer in sjpanning en angs te höbbe laote wachte.

    Gelökkig waor d’r nao de wedstried de troost van ein drenkske bie ‘t Rien en ein breudje Rupsjbendjjjj. In de zon woort, nog ômmer zonger polo, genoate van ‘t wear en de pot van ôzze groate broor.
    Volgende weak nao de natuurgraas wei in Neerritter: On y va!