Naodat de carnaval langzaam is verwèrk, de meiste allemaol waal minstens ein bietje krank zeen geweas én de rös in ‘t Genhoutse weer is wedergekeerd, woort ‘t tied um de competitie weer te vervolge. Es klap op de vuurpiel kreeg Rouge auch eindelijk ziene polo euverhandig, wodoor ‘t eindelijk veur eederein good veult um ‘m aan te doon. Doert eave, maar dan höbse auch get nao 30-40 daag wachte.

Enfin, de teagesjtander van aafgelaupe zondig waor Hoensbroek. Begin dit seizoen leverde dit ein 1-3 euverwinning op veur ozze road-witte, maar auch veurig seizoen bleek dat de ‘blauwe’ altied verassend oet de hook kènne komme. Ondanks dat waor ‘t geveul good, want de lètste 3 wedstrieje woort umgezat in 9 punt (veur de iets minder sjnelle reakenwonders van Genhout; dat beteikent dat ze alle 3 zeen gewonne). Tied um dao 12 oet 4 van te maake! En dat zou neet onlogisch zeen, want in dit soort fases zouwe de gelieërde (neet te verwarre mèt de Geliënde, de meiste sjpas…) sjpreake van eine stijgende spiraal. Dit klink missjien vream in de oare, en dit betruf auch zeker gein voorbehoedsmiddel, maar dit is ein psychologische term oet de sjteintied van Aelse.

Mer good, dit begint langzaam op ein weitensjappelijk artikel te lieke en dat is veur Genhoutenaere natuurlijk al in Oos Nuuts te vinge, dus laot ver ‘t hie mer euver de wedstried goan höbbe. Ein good begin is altied ‘t hauve werk. Zoa dach Hoensbroek althans dereuver… Nao 1 minuut sjpele bleek namelijk eine lange bal de aanvaller te bereike en dae kosj vrie ongehinderd de 0-1 bènne sjuuve. Wakker. Hienao begosjte de road-witte hun sjpelke op te pakke en woort, al waor ‘t af en toe mit get meuite, hie en dao veur get gevaar gezurg. Ondanks dat waor ‘t wachte tot de 19e minuut, wo Hugo de eerste echte kans leet notere veur GSV. Helaas trof dizze (nog) gein doel. De kanse waore schaars, aan beide kante. Der waore waal, mieër dan gemiddeld, euvertredinge te notere en af en toe al get irritaties dao euver. In de 36e minuut keem GSV kort bie de 1-1, echter trof de vrieje trap de lat. Dit waor de opmoat veur mieër, want 1 minuut later keem Martijn C good door op de rechterkant (aangemoedig door de teagesjtander mèt de weurd “die weet het niet, die weet het niet!”) en goof ‘m lieëg veur op Hugo, dae de bal vakkundig mèt ein hakje achter zien sjtandbein achter de keeper wees te wèrreke: 1-1! Eave later kreeg auch Tom nog ein goeie kans om de veursjprong op ‘t bord te kuppe nao eine veurzat van Koen, helaas ging de bal euver ‘t geulke heen. Rös.

In de rös helaas geine ranja, want ‘t Rien is krank en dan weit de horeca-aafdeiling van GSV ‘t mer moeilijk te bolwèrreke in de drökte van de rös. Verder gein probleem, ger heurt van os op de ledevergadering.

Nao de rös keem Rouge (noe zonger polo) derin veur Tom en wouw GSV in elk geval beater sjtarte es in de ieërste hellef. Dit kosj zomaar lökke nao eine goeije aanval vlak nao rös, maar de sjeut van kleine Max ging neave. Eave later waor ‘t eine bienao vergeliekbare lange bal van Hoensbroek es bie de goal dae de aanvaller van hun weer vrie richting Tim sjikte. Wederom leet de aanvaller Tim kansloos en sjtong ‘t nao 49 minuten 1-2. Wederom waore de kanse neet veelvuldig, echter ging GSV waal mieër en mieër aandringe. In de 62e minuut ging Koen good door op de rechterkant. Nao de teagesjtander aafgesjut te höbbe kreeg ‘r ‘m nog veur de goal wo kleine Max ‘m door de bein van de keeper bènne sjoot: 2-2! Hienao bleef GSV aanzètte en keeme get veersje krachte derin (Siebyech en Jeff van Peppe) die de drök richting de goal van Hoensbroek nog moosjte versjterke. Tot éch groate kanse keem ‘t helaas neet mieër, op 1 kans nao. In de 82e minuut keem de bal bie Koen terech in de 16 en dea wees ‘m bienao mèt de töp bie de 2e poal bènne te sjeete. Helaas sjampte de bal de poal en bleef de 2-2 sjtand op ‘t bord.

Al mèt al geine oetzonderlijke pot um vanaaf de kant te bekieke, maar waal de 4e wedstried op rie dat de road-witte ongesjlaage bleeve. Soms mosse ‘t goeije blieve zeen. De daag woort aafgesjloate in de Gasterie, aangezeen de horeca-aafdeiling op ranja-cursus ging bie Gelean-Zuid. Helaas geine rupsjbendjj, maar ein paar good gevulde mendjes en veur eine biezonjere zelfs ein apaart diner bie batterie-kears-leech.

Tot volgende weak!