Nao ‘t gelieksjpel veurige weak teage Hoensbroek, mochte de manne van tsjwé aafgelaupe zondig de langste reis van ‘t sezoen goan maake. Teagesjtander waor Laor, bie die groate geale M in Nederweert linksaaf. Nao ein bekske kaffe (of get angersj) bie ‘t Rien sjtapte ongevieër de ganse bubs in de waages. 2 man keeme rechstreeks, die waore weeze vrieje in ‘t noorde van de provincie. ‘T zal vas mèt ‘t dialec te maake höbbe wo ze ein zjwaak veur höbbe. Bie aankoms in Laor woorte ver mèt oape daak ontvange en bleek dat ze van de kentien ein tent höbbe probere te maake mèt get hauve zeile en latte. Qua duurzaamheid ein zeer positief boewprojec, zeker in tieje van provinciale verkeezinge. “Valle de energiekoste van de kentien uch zjwaor? Aarzel neet en sjtöm Laor. Veer boewe de kentien toe mèt latte en zeile, en uch reakening kent ger door veere deile.”

Enfin, nao de veurbereidende woorde van Sjlot en zien team en eine degelijke opwerming, waore de manne klaor veur, wat op veurhand leek, eine zjwaore pot. In ‘t Genhoutse woort, jammerlijk, mèt 2-3 verlaore nao eine 2-1 sjtand nao 88 minuute. D’r waor dus nog get good te maake! Helaas kèn ich uch neet veurzeen van de exacte minuute, aangezeen de vaste journalis van deens ouwersjapsverlof heij en der wier neemes op de bank kènt tèlle of mèt eine tillefoon kènt umgoan. Maar veur de statistici onger ôs, sjrief ich geweun get minute op zoadat dees luu toch nog örges enthousias van weare.

De wedstried begosj in minuut 0, mèt eine 0-0 sjtand, 22 sjpelers op ‘t veld, 1’ne Engelsj-sjpreakende sjeids dea zich Ref sjreef (hiemèt kosj dus bienao neemes communicere want zoa internationaal zeen ver neet) en 2 grensrechters, wovan eine wáál erg internationaal is en bènnekort op zaakereis richting Zuid-Afrika geit veur eave get te peile (landboewgrond bedoel ver natuurlijk..). ‘T begin waor veur ôs, de road-witten. De beleaving waor good, duels woorte väöl gewonne en ver waor sjerp aanwezig. Tot echte kanse leidde dit echter neet helaas. De luu in ‘t oranje kreege dit get sjneller veur elkaar. Enkele maale (16e, 32e en 37e minuut gok ich) keeme ze gevearlijk veur Tim, maar de aanval waor neet sjerp genoch en Tim kosj good redding brènge. Hae heij wier auch neet väöl um euver nao te dènke, want zien opdrach waor duudelijk: “houd dien bakkes en vang dea bal”. Es ger hie mieër euver wilt weite verwies ich uch door nao ‘t book “De eenvoud van duidelijkheid: hoe te communiceren met keepers”. Ver ginge dus de rös in mèt 0-0. Of wie de ouwere luu zèggke: niks-niks. Euver niks gesjpraoke, The Goose dach get mieër in de mèllek te brokkele te höbbe dan de res door in de kleidkamer te roope dat zien trainingsbrook van heum zelf waor. Sjlot reageerde mèt ‘t gezègkde van de weak oet de Aelserse sjteintied: “Dooch dich de auge mer toe, dan zuuse wat van dich is!”.

In de rös gein opmerkelijke zaake, boete ‘t feit dat de ranja weer ontbroak. Maar wea heat auch de besjikking euver ranja es se in ein tent woons? Dan maak se geweun sumpelweg get tieë oet reagewater en vèttige blaajer. Väöl duurzamer. Bent u met milieuvervuiling klaar? Stem Laar.

In de twieëde hèlluf ongewijzigde teams en nog ummer ein ervare trio dat de leiding hauw. Noa ein minuut of 52 keem der eine lange bal vanoet de verdediging van Laor. De road-witten sjtonge neet geweldig en ein van de aanvallers wees te ontsjnappe richting de 16. Hae kosj ‘m vrie veurgeave richting de mètgeloupe collega en dae kosj ‘m in ein leage goal sjuuve: 1-0. Vervolgens bleef ‘t sjpelbeeld vriewaal geliek, der waore väöl duels en vrie weinig échte kanse. Vervolgens keeme der get wisselinge. Dorsjoe woort vervange door Ja-Pie. Helaas veur Jan Laumen ging Ja-Pie neet nao rechsback, maar zakte Rouge nao de backplaats en ging Ja-Pie veurin broeze. Eave later ging auch The Goose, mèt get opkommende las, deroet en keem Remy Robbe bènne de liene. Langzaam ginge de road-witte get mieër nao veur sjpeele, in de houp minimaal ein punt te score. En dat punt leek der te komme! In de 82e minuut kreege de road-witten eine vrieje trap vanaaf de rechterkant. Deze woort veurgegeave en keem bie de twieëde poal terech wo Jesper de bal vakkundig achter de keeper wèrrekte! 1-1!

Nog eine kleine 10 minute volhouwe, of zelfs nog de 1-2 te maake. Maar zo wie dan ein sjoan gezègkde (neet oet Aelse trouwens) weurd geroope door de gelieërde: “ein punt is auch ein punt!”. In ‘t restant keeme der vanoet beide kante gein gevaerlijke momente mieër, en woort de wedstried besjloate mèt eine verdeenstelijke 1-1. Hel wèrreke es team is dus deils beloand gewoore. Naodat Ref bedank woar gewoore veur zien deenste (“Good gewhistled, Ref”), kosj de douche opgezoch weare.

Aangezeen in de tent van Laor weinig bittergarnituur-loch hing, waor al sjnel besjlis dat die geale M woort opgezoch. Nao ein romantisch diner ging de weag weer trök nao ‘t Genhoutse wo de manne van 1 nog get sjteun kreege.

11 punt oet de lètste 5 putjes is neet verkieërd natuurlijk. Zeker noa ein rumoerige weak wo-in de speculaties euver de trainerssjtaf van 2023-2024 de gemoederen in Genhout erg bezig houwe. Volges de bronne van Oos Nuuts zeen der nog tsjwé kandidaate die groate kans maake: Thei d’n Ub (kent der ein good-dreijend team van maake) en Kenny Jansse (is good in leiding-geavende functies). Ver zulle zeen wat de kommende weake zal geave. Zondig de wedstried in en teage Bekkerveld. En verder? Gein nuuts.