“Meersje en de 7 ketsers”, door de Gebroeders Grimm.
Nao de midweekse escapades in Neerritter, wo ein knap en teevens verdeend punt woord behaold, mochte ozze ‘roaje’ aafgelaupe zonjig de kopluiper ontvange op ‘t Jean Nieste Sjportpark. ‘T wear waor prima en de coach (Joep Sjlot) waor auch weer aanwezig nao ein culinair oetsjtepke. Dat waore enkele mooie omstandigheden. Der waore auch get minder mooie omstandigheden, maar dat is ‘t risico van eine jonge, fruitige, enthousiaste en zeer sociale groep. Enfin, gevoetbald ging der weare.

De warming-up verleep good, missjien waal té good. Tim Cillissen reep weer ziene weakelijkse “Manne sjeet noe ins tössje die päöl ouwhoor” en daomet waore alle rituele van de warming-up compleet. Alles verleep dus verassend soepel en dit leek ‘t begin van ein prachtig sprookje…

Ich weit neet wie sjnel dat geer es leazer ein sprookje kent leaze, maar dat van os doerde sjlechs (of ‘maar leefs’) 14 ganse minute. Nao al get sjpeldeprikjes maakte Meersje oeteindelijk de 0-1. Dit hoof gein probleem te zeen, maar dan mot neet 4 minute later de 0-2 valle en al helemaol neet 1 minuut doanao de 0-3. De luu die dus nog ummer op zonjig om 12 oer werrem middig maake, die heije al sjoan 3 goale gemis. Maar, ze heije gelök dat ‘t aan de ‘roaje’ kant neet väöl beater woort en in de 22e minuut al de 0-4 in ‘t netje looch. Frenske Feron en Erik Lemmens heije al saame mèt ‘t Meersje publiek de “10-10-10-10” ingezat, maar zo wiet wouw neemes ‘t loate komme natuurlijk. Veur rös woort ‘t echter waal nog 0-5…

Rös. Ranja (erg zeut Rien). Sjlot mèt verheven, doch gerespecteerde sjtöm mèt ein goei analyse en waal enigszins goeije mood om der de 2e hellef nog get van te maake.

Nao rös neet direc ein anger sjpelbeeld, al ginge de ‘basisfoute’ bie os al get mieër deroet, en dat sjealt al gauw eine houp ellende. Kaajel Vente (veur Rafinha) moch zien intrede doon en lekker dosere, Nickytarian moch auch nog ein paar kieër langs de lien opvleege en Mattias Messi koosj nog eave broeze veurin. Ja-Pie ging noa ouwe tieje en moch zien rechsbackminute weer oetbreije. Enfin, ‘t woord nog 0-7, maar ger heijt toch neet verwach dat dit sprookje nog good aafleep. Sorry doaveur. Gein geld teruuk garantie, toch Sollie?

Eine wieze zou gezach höbbe: “of se noe mèt 0-1 of 0-7 verlus, de eindigs altied mèt niks in de tesj”. Amen.