“Veritas is waarheid, maar waarheid kan ook een leugen zijn.”
Donderdigaovend, de aovendkou van november is eindelijk ingetroaje, en de coach is verhinderd. Esof dit gein good recep zou zeen veur ‘nne aovendwedstried op de graaspolle in Neeritter! Neeritter, ein nostalgisch pleatske onger de zon in ‘t noorde van wo veer väöl te wiet weg van woone. Goei plaats um in de buurt te vrieje, dat waal. Enfin, ver motte wier…

Um de christelijke tied van hauf 7 woort verzameld veur de poart. Os Rien hauw verlof en d’r Pé waor sjokolaat aan’t bakke. Hoebaer waor stand-in en hauw väöl gelök mit d’r Potlood, dae ‘m al ‘t nut werrek oet heng noam. Hein keem noa mèt d’r caddie, dat waor ein enorme verlichting veur Hoebaer, want ziene koffer mot zuuver blieve. Veur die 3 punt uiteraard…

Um ‘n oer of 8 woort, noa ‘n bietje gehaaste warming-up (tiedsplanning is get van 2021), aafgetrap door de ‘roaje’ van oppe berg. Al vanaaf de aaftrap woar de wedstried intens. Väöl drök, chaos, duels, roope, roope, polle, roope en chaos. Ech get veur de männer van os. Invloed op ‘t strijdplan heij dit neet, en al met al sjtong ‘t prima!

Her en der waore der get kleine plaagstootjes, maar ech groate kanse leverde dit neet op. Totdat eine lange bal vanaaf de linkerflank, bezat met Alba en Robben, bie Keun in de buurt keem en hae dernao saame mèt ‘nne verdediger van de thoesploog en hunne keeper in ein soort van vrije worsteling terech kreeg en Keun ‘m waal nog bie Prosje 1 in de veut kreeg gesjpeeld. Prosje 1 wees waal road met de vriewaal leage goal en leet de 0-1 noteren. Vamos!

In de rös geine zeute kroam, maar ouwerwets en tas tieë. Waor euverigens neet super werrem, dus koud water hoofde ver neet derbie te sjödde. Klein detail, maar details maake op dit niveau ‘t versjil natuurlijk. Hoebaer waor tevree en houw nog get kleine verbeateringe, die euverigens neet gans direc aankeeme. Maar de weag wo ver op zoote, kosj ver bes zoa aanhouwe. Ongewijzig ginge ver weer de echte wei op.

In de tweede hellef ‘t zelfde sjpelbeeld, al heij Veritas noe get mieër in de mellèk te brokkele. Oeteindelijk waor ‘t echter toch Noudje (dae haet get teage Genhout geluif ver, want dae verrèkeling scoort ummer) dae de score met ein bekeeke goal nao 1-1 tilde. Rond de 70e minuut waor d’r echter eave opsjudding in ‘t veld, want d’r leidsman, dae erg aanwezig waor mit zien kaartsjpel, besjloat ozze Ard van P. zien twieëde geal te geave. Of de sjeids dit weakelijks deit is neet bekend, maar ver dènke dat ‘t de zenuwe waore veur de intoch van d’r goodheiligman. Erg euverdreve waal, veur ein sjtruukelpartie.
Enfin, alle hens aan dek, want der moosj nog ein flinke poos gehobbeld waere. Der woort bie os roaje ein en anger umgezat, um de balans weer te hervinden nao de roaje prent. The Goose en Ja-pie keeme de liene in en moosjte ein gelieksjpel vas probere te houwe. Ja-Pie houw anger planne, want dea heij al get lang in eine tuin in Mesjtreech gebraggeld en waor dus ram doorein (in de goei zin van ‘t woord natuurlijk). Eine veurzat van …. keem bie Jesper in de veut op de penantiesjtip en dae koosj dreije en op goal peare. De keeper koosj ‘m neet perfec verwèrreke en dao sjtong de landscaper perfec en attent gepositioneerd um de 1-2 benne te loetsje. Lang vieren!

Toen waor ‘t dus nog eave 10 minuute metsele en ongegeneerd wegrosse. Veritas goof flinke druk natuurlijk, maar de roaje raakte neet van de wies. Totdat.. de sjeids eine vrieje trap goof aan de thoesploog en die besjloate neet te wachte op hunne geblesseerde sjpeler op de grond. Ver waore neet sjnel genoch gesjakeld en Veritas ging opins in euvertal richting de goal van Tim. Via ein hobbelbelke rolde de bal der tergend langzaam in… toch nog 2-2. Noe waor ‘t zaak um der gein ‘Laartje’ van de maake, en dat gebeurde auch neet.

Al mèt al eine terechte oetsjlaag en woort d’r sinds ein aantal kieëre weer ins ein punt mètgenomme oet ‘t riek van de Walvaegers. Hein zurgde dat de sjpulle veilig en gans in Genhout aankeeme en Hoebaer bleef in ‘t Noorde. Prima donderdigaovend verder. En verder? Zondig weer aan’m! En verder? Nog ummer gein nuuts!