Aafgelaupe zondig, mèt ein temperatuur wovan se sjpontaan geis zeuke nao ‘t Noorderleech, mochte “Die von Zwei” veur de lètste pot van 2022 de wei in. En ondanks dat 2022 väöl sjoans heij gebrach, leep ‘t de lètste weake minder soepel en waor de wunsj om mèt eine driepunter de wintersjloap in te goan erg groat.

Mèt eine werreme speech van ozze Sjlot en get opbeurende weurd oet de keal van eine verdwaalde op zak, mosjte de manne toch nao boete veur eine warming-up. Dizze sjtroalde motivatie oet en de wil veur eindelijk weer ein euverwinning. Nog eave alles insjmeere mèt vaselien, vix en tijgerzauf om aossem te kriege en wermte vas te houwe, ging ver klunend richting ‘t kunsmatje.

Auch veur de teagesjtander, Limburgia, waor dit eine belangrieke pot. Zie sjtoan der ongevieër ‘t zelfde veur. De beginfase is echter veur ozze ‘roaje’. Ondanks nog weinig kanse, waor ‘t meerendeil van de tied de Genhouter equippe dea de controller in de heng hauw. Noa ein dik kwarteer kreeg Limburgia get druk nao veur, mede door hun behendige veurhoede. Nao 20 minute leidde dit zefs tot ‘n goal, zou ‘t neet dat de aanvaller in boetesjpelpositie sjtong. Ein 2-tal minute later waor auch ‘t eerste gevaar vanoet GSV te melde. Yannick Dumfries, dae zonjig natuurlijk weer tied hauw, woort door eine prima deepe bal richting goal gesjik. Rustig bleef ‘r neet ech, en de bal ging op ein korte reis. Naodat dae bal geland waor, kreeg GSV eave later eine curner welke de kop van Roy “Luuuuuukasss” vong. De keeper waor gepasseerd, maar der sjtong nog eine verdediger op de lien dea redding brach. Daonao kreeg wederom Dumfries de meugelijkheid de 1-0 op ‘t bord te sjeete, echter waor de ieërste reis ein opmaat nao ein buitenaardelijkse reis en woort de bal richting de poolcirkel gelanceerd. Alles leek dus op eine heuze brilsjtand in de rus. Helaas goof ein te korte teruuksjpeelbal de sjpits van Limburgia de kans om Tim te omsjpele en woort dizze geraak in zien actie. Penalty. Helaas veur Genhout sjreef dea jong zich neet Steven of Virgil, en dus noteerde de sjeids de 0-1…

Ondanks de sjtand, bietje irritatie euver ‘t weggeave van de goal en de kou, waor de sjtumming in de kleidkamer nog ummer gemotiveerd. Sjlot goof terech aan dat alles aanwezig waor um dit um te dreije. Nao deils ranja (goei proportie) en werreme tieë van ‘t Rien van de Kantien, ginge de manne nogmaals de kou in veur ‘t vervolg.

De luu langs de kant hoofde neet lang te wachte om hun kouwe heng opein te klatsje, want mede door hoog druk zette van GSV keem de bal bie Dean terech in de vijandelijke 16. Opmerkelijk rustig woort de linker ongerhook gevonge en waor de achtersjtand alweer weggewerk. Langs de kant woort al opgevange “they can come an end”, maar van weam dat aafkeem is nog ummer de vroag. Want Engelsj weurd in Genhout neet gegeave op de sjoal en internationaal gezeen is ‘t nog gein trekpleister. Enfin, de druk bleef aanhouwe en der keeme nog kenskes. Wederom woort eine curner van de lien gehaold nao de inzet van Dorsjoe. De sjtrijd bleef goande, en beide partieje zochte nao de euverwinning. In de 74e minuut (nog net neet in ‘t “kwarteer van sfeer”) keem eine aanval van de ‘roaje’ via get klutse bie Dean in de veut. Nao get gesjravel woort de zelfde hook gezoch, én belangrieker, gevonge! De led-lempkes mochte aan ‘t werk, want de 2-1 sjtong op ‘t bord!

Ja-Pie woort vervolgens aafgelos door Keun, dae euverigens de enige kent zeen wat Engelsj kalt (wilse get vertaald höbbe, give him a call) en The Goose d’r Dumfries moch vervange, keeme der natuurlijk nog get kanse op de 3-1, door de ruimte die ontsjtong. Helaas weeste Yannick (dae waor d’r toen nog effe) en Max L de kanse neet te verzilvere. Limburgia ging de bel derin pompe, zo wie Plan B van Lewieke auch waor, en dit leverde nog ein hachelijke situaasie op. Eine bal op de lat keem veur de veut van eine van Limburgiaen dae sjoat ‘m zonger aarzele bènne. Noa get twiefel van de sjeids waor hea toch sjtellig en woort veur dizze boetesjpelgoal ‘geweun’ eine vrieje trap gegeave en ging de wedstried zoa nao zien einde..

Éindelijk weer ein euverwinning veur de manne van 2, die zoa toch lekker de fieësdaag ingoan. Sjlot dea heult opgeluch aojem en heult de keasj. De peoplemanager Sol zurgde veur de welverdiende versnapering en mèt dat in de hand koosj de werreme doesj opgezoch weare. Aafsjleete gebeurde natuurlijk mèt get rupsjbendjjdjdjd en de partie van 1.

Veer wille alle fans bedanke veur hun geluif en sjteun in 2022 en zeen uch gear in fibbrewarie weer teruuk. De ieërste échte pot is dan teage de buure van ongeraan de berg. En tot dea tied? Verder gein nuuts!